Home

zurück

 

 

 

 

 

 

 

 

Düxer Klaaf

Jedeechte, Rümcher un Verzällcher us Kölle

 

 

 

De Ungerbotz 

Jott sei Dank, et wor widder Rusemondaach. Wie lang hatt ich mich ald dodrop jefreut!

Am Opstellplatz, dat wor diesmol an Zint Jiriun, hoot ich, wie einer för ene andere saat: “Un der Petrus ess doch ene Kölsche“.

An däm Dach dät et stemme. Et Wedder wor herrlich. Alljemein wor de Stimmung prima un esu jingk die Zick, bes mer losstroke, relativ schnell vörbei. Wie bekannt, versök mer, koot bevör der Zoch losjeit, noch ens op der Abtrett ze kumme. För dä Zweck hatt de Stadt odder et Fesskomitee esu ne Abtrettswage opstelle losse. Do jingk ich hin. Ävver de Mannslücksabteilung wor üvverschwemmp met Fraulück.

Weil die jo nit unbedingk op et Pinkelatorium jonn, kunnte die Mannslück sich dörchdrängele un ehr klein Jeschäff trotzdäm erledije.

Dann jingk et loss. Mir kome en de Mohrestross eren, un noh e paar Schrett stund widder alles.

Ich kom unger enem wick offe Parterrfinster ze stonn. Wenn der Zoch steiht, weed et räächs un links dröm eröm och ruhijer. Dodurch kunnt ich dä Diskösch us dem Finster verstonn:

„Dat wor die schöne Vas, die uns de Tant Billa för de Huhzick jeschenk hät, un jetzt ess se kapott.“ „Ich han doch jesaht, Do solls dat Zeuch fottrüme, dann jeiht och nix kapott, un Du weiss doch jenau, dat de Pralineschachtele wick fleeje.“

Et wor schad, ävver ich kunnt däm Disköösch nit wigger zohüre, weil et me'm Zoch vöranjing. Wie mer en de Zeughausstross erenkome, wor uns Schmölzje esu usenanderjetrocke, dat jeder von uns 5 Meter Stroß för sich allein hatt.

Dat es ävver nit tragisch, jubele ka'mer och allein. Ich och. För luuter Jubel han ich dä Katong, der op der Stroß loch, nit jesinn - un och der Plastiksack en däm Katong nit.

Vum Fesskomitee krije mer de Kostüme zojedeilt. Ich hadder eins erwisch, do hädden zwei vun minger Zoot erenjepasss. Et wor e beßje jet ärch vill ze jross. Weil ich ävver keine Jöd oder Kood dobei hatt, mohten 3 Nihnodele dat Ovverdeil met der Botz zesammehalde.

Ich trot natörlich en dä Katong un han mich en däm Plastiksack verfange. Dä! Räächs die Secherheitsnodel jingk op. Links die Schicherheitsnol jingk op. Un wie hinger die Secherheitsnodel och noch opjing, wor jet em Jang: ming Botz jingk fleute.

Und esu stundt ich dann do. Nä, nit em koote Hemp, ävver en ener koote Ungerbotz!!

Et Publikum räächs un links hät övver ming Ungerbotz jenau esuvill jejubelt wie vill späder, wie et Dreijesteen kom.

© Helmut Bierfert