Home

zurück

 

 

 

 

 

 

 

Düxer Klaaf

Jedeechte, Rümcher un Verzällcher us Kölle

 

 

Et Möscheschlössje

 

Vör zwei Johr hann ich üch e koot Verzällche vum Bruno Eichel vörjelese: „Wo sin all die Mösche hin?“ Hück weiß ich et!

Noh etliche Johre ben ich widder en ming ahl Heimat Poll jetrocke, tirek nevven dä ahle Borehoff om Sandberg, janz bovven huh. Vun do us kann ich der Kölner Dom, der Colonius, der Media Tower un e Stöckelche vum Henkelmännche sinn. Ävver am schönste es minge Bleck en dä Borehoff.

Do laufe noch jlöcklije Säu, Jäns, Katze und janz vill Pöllcher (för de Imis: Höhner) eröm, un nit zo verjesse, dä Hoffhungk. Dä Borehoff hät zor Stroßesick en schön ahl Backsteinmor, un do jäjenövver op der andere Stroßesick es ne janz met Knöterich zojewahße Jade. De Bäum, Strüch un Hecke sin bes op 10m domet zojedeck. Dat süht vun he bovven us wie et Doonrüsjeschloss.

En däm Doonrüsjeschloss wonnt en janze Möschebajaasch un do ess der janzen Daach Jeschratels. Mösche dolde kein Mäle, Duve, Krole un ander Vüjelcher öm sich eröm. De Einzije, die do och wonne dörve, sin e paar jröne, wilde Sittiche. Die bruche de Mösche bestemmp, för jet Färv en der Wonnung zo han.

De Möschebajaasch es op dat Jeräusch jetremmp, wann de Pöllcher om Borehoff ehr Foder krije.

Et ess, wie wann einer e Fleutche nemmb un fleut - dann jeit et loss! Un wa’mer dann jrad om Trottewar an däm Borehoffsmörche ess, muss mer singen Däts entrecke, weil de janze Mööschebajaasch wie de Stukas dann vum Doonrüsjeschloss övver de Stroß un dat Mörche jefloge kütt, tirek an dä Foderpott. Wie jesaat, der Däts entrecke, söns hät mer de Kläucher vun dä Mösche en de Hoore.

Wann de Pöllcher nit tirek Plaaz maache, wäden die einfach jet en de Fott jepeck. Wann dann de Pöllcher met vill Jekrieh op Sick jefloge sin, setze de Mösche en enem brunge Kreis öm dä Foderpott eröm.

Selvs vör de Katze und däm Hoffhungk hann se keine Schess. Un wann et ränt, fleje de Mösche en de Höhnerkau, för do ze käue.

Wann se dann dat Möschebüchelche voll hann, jeit et widder, wie op Kommando, em Stukaflog övver dat Borehoffsmörche un de Stroß zoröck en et Möscheschlössje.

Kacke dunn se beim Rückfloch övver der Stroß, domet ehr Schlössje sauber bliev.

Esu maache de Mösche dat e paar Mol am Daach.

Dat Möscheschlössje ess esu zojewahße, dat do och kein Katz eren kütt, un em Winter blieve de Möscheföttcher wärm.

Et ess einfach schön, däm janze Spillche Daach för Daach zozolore, un dat medden en der Stadt. Do sage de Lück immer, de Papajeije, Krole, Elstere un andere Vüjelcher wören schlau. Ävver ich jläuve, dat uns jot ahl Mösche einfach schlauer sin, och wann se nit schwade künne.

Ich hoffe, dat dat Möscheschlössje noch lang esu zojewahße bliev, un uns jot ahl Mösche ehr Heimat behalde.

© Marlies Stahl