Home

zurück

 

 

 

 

 

 

 

Düxer Klaaf

Jedeechte, Rümcher un Verzällcher us Kölle

 

 

Fringse jonn

Mer sin 1945 tirek noh'm Kreech widder noh Kölle zoröckjekumme. De Wonnung stundt noch, nor e paar Finster wore kapott. Do hät mi Vatter Pappendeckel vorjenält. Nojo, et wor kalt un mer hann en de Trümmerjrundstöcke Holz jesök. Do wor ävver kaum noch jet, weil - dat dät jo jeder.

Alsu ha'mer Klütte jekläut. Minger Eldere wor dat jo eijentlich nit rääch. Die wore nämlich wie mer esu säht jot katholisch, un kläue wor jo en Sünd. Ävver wat well mer maache?! Späder fohlten se sich besser, wie der Kardinal Frings en singer Sylvesterprädich 1946 jesaht hatt, dat mer dat esuzesage „dürf“, esulang mer bloß Saache kläue däte, die mer unbedingk för et Levve bruch. Zickdäm jingke mer nit mih "Klütte kläue", mer jingke  "fringse". Wat jo och vum Bejreff herr vill schöner klingk, ne!

Mir dötzten vum Ihrefeld zo Foß noh Ohßendörp. Do stundte de Klüttewage. Mänchmol woren erer och kein do, odder de Lück komen uns entjäje un sahten: "Ehr brucht jar nit hinzejonn, de Polente ess do." Ävver mihtstens hatte mer Jlöck.

Jetz wor et esu, dat mir kei Wägelche un nix hatte, mir mohten die Klütte drage. Mi Vatter hatt ene Sack om Puckel, ming Mamm zwei Täsche un ich ich wor 8 Johr moht och zwei Täsche drage - ävver kleinere wie die vun minger Mamm.

Et wor koot vör Weihnachte, ich jläuv, et wor zwei Däch vör Hellich Ovend un et hatt öntlich jeschneit. Minge Papp wor jrad nit doheim un de Mamm meinte, mer sollten der Schledde nemme un domet fringse jonn. Dann künnte mer die Klütte trecke. Vill drage kunnten mir Zwei jo nit.

Mir sin dann lossjetrocke. De Klüttewage woren do un de Luff rein. Ich moht met mingem Schledde am Bahndamm wade, un ming Mamm ess op dä Wage jeklomme. Ich dorf nit op dä Wage, ming Eldere hatten Angks, dat dä Zoch affahre künnt un ich söhs drop.

Wie ich do esu stundt met mingem Schledde un op de Mamm wade dät,  reefen op eimol de Lück: “De Polente kütt, de Polente kütt”! Un do hoot mer och ald dat Hoon vun der Militärpolizei.

Alles wor fott am laufe. Ich hann nix jedaach, hann minge Schledde jenomme un ben och tirre jejange. Ich ben jelaufe, esu schnell wie ich kunnt - bes noh Ohßendörp eren, dat se mich nit mih schnappe kunnte. Do ben ich dann stonn jeblevve un hann op de Mamm jewad. Ich daach, die möht jo he vörbeikumme.

Ich hann jewad un jewad, ävver de Mamm kom nit. Ich kunnt mer schon denke, dat se geschnapp wode wor, weil, esu schnell kunnt die jo nit vun däm Wage erafklemme. Ich hatt e ärch schlääch Jewesse, weil ich se jo em Ress jeloße hatt. Do krääch ich et öntlich met der Angks ze dunn. Ich moht esujar e bessje kriesche.

Op eimol sohch ich se ganz hinger kumme. Ehr jläuvt nit, wie fruh ich wor. Se kom natörlich mit leddije Häng, die Täsche hatten se ehr och afjenomme.

Su si’mer dann mit däm leddije Schledde heimjetrocke. Ovends, wie minge Papp heim kom, hät dä jeschannt, weil mer do allein hinjejange sin.

Un Hellich Ovend hatte mer kein Klütte.

© Gerti Joedicke